Noctes Atticae

Gellius, Aulus

Gellius, Aulus. The Attic Nights of Aulus Gellius. Rolfe, John C., editor. Cambridge, Mass.; London: Harvard University Press; William Heinemann, 1927 (printing).

Item alio capite: Qui alienum tacens [*](alienum quid iacens, Dig. xlvii. 2. 43. 4.) lucri faciendi causa sustulit, furti obstringitur, sive scit cuius sit, sive nescit.

Haec quidem sic, in eo quo nunc dixi, Sabinus scripsit de rebus furti faciendi causa adtrectatis.

Sed meminisse debemus, secundum ea quae supra scripsi, furtum sine ulla quoque adtrectatione fieri posse, sola mente atque animo ut furtum fiat adnitente.

Quocirca ne id quidem Sabinus [*](Fr. 4, H; 127 Br.) dubitare se ait, quin dominus furti sit condemnandus qui servo suo uti furtum faceret imperavit.

Dissertatio Favorini philosophi, qua suasit nobili feminae uti liberos quos peperisset, non nutricum aliarum, sed sibi suo lacte aleret.

NUNTIATUM quondam est Favorino philosopho, nobis praesentibus, uxorem auditoris sectatorisque sui paululum ante enixam auctumque eum esse nato filio.