Noctes Atticae
Gellius, Aulus
Gellius, Aulus. The Attic Nights of Aulus Gellius. Rolfe, John C., editor. Cambridge, Mass.; London: Harvard University Press; William Heinemann, 1927 (printing).
Anus hospita atque incognita ad Tarquinium Superbum regem adiit, libros ferens, quos esse divina oracula: eos velle venundare.
Tarquinius pretium percontatus est.
Mulier nimium atque inmensum
poposcit; rex, quasi anus aetate desiperet, derisit.illa foculum coram cum igni apponit, tris libros ex novem deurit et ecquid reliquos sex eodem pretio emere vellet regem interrogavit.
Sed enim Tarquinius id multo risit magis dixitque anum iam procul dubio delirare.
Mulier ibidem statim tris alios libros exussit atque id ipsum denuo placide rogat, ut tris reliquos illo pretio emat.
Tarquinius ore iam serio atque attentiore animo fit, constantiam confidentiamque non insuper habendam intellegit, libros tris reliquos mercatur nihilo minore pretio quam quod erat petitum pro omnibus.
Sed mulierem tunc a Tarquinio digressam postea nusquam loci visam constitit.
Libri tres, in sacrarium conditi, Sibyllini appellati;
ad eos quasi ad oraculum adeunt, cum di immortales consulendi sunt.
Quid geometrae dicant ἐπίπεδον, quid στερεόν, quid κύβον quid γραμμήν; quibusque ista omnia Latinis vocabulis appellentur.
FIGURARUM quae σχήματα geometrae appellant, genera sunt duo, planum et solidum.
Haec ipsi vocant ἐπίπεδον καὶ στερεόν. Planum est quod in duas partis solum lineas habet, qua latum est et
qua longum; qualia sunt triquetra et quadrata, quae in area fiunt, sine altitudine.Solidum est quando non longitudines modo et latitudines numeri linearum efficiunt, sed etiam extollunt altitudines, quales sunt ferme metae triangulae quas pyramidas appellant, vel qualia sunt quadrata undique, quae, κύβους illi, nos quadrantalia dicimus.