Priapeia

Priaepia

Poeta Latini minores, ed. Aemilius Baehrens, Leipzig, Teubner, 1879

  1. Quidam mollior anseris medulla
  2. furatum uenit huc amore poenae:
  3. furetur licet usque, non uidebo.
  1. Hic tibi qui rostro crescentia lilia morsit,
  2. caeditur e tepida uictima porcus hara:
  3. ne tamen exanimum facias pecus omne, Priape,
  4. horti sit, facias, ianua clausa tui.
  1. Tu, quae ne uideas notam uirilem,
  2. hinc auerteris, ut decet pudicam:
  3. nimirum, nisi quod times uideri,
  4. intra uiscera habere concupiscis.
  1. Penelopes primam Didonis prima sequatur
  2. et primam Cadmi syllaba prima Remi,
  3. quodque fit ex illis, tu mi deprensus in horto,
  4. fur, dabis: hac poena culpa luenda tua est.
  1. Rusticus indocte si quid dixisse uidebor,
  2. da ueniam: libros non lego, poma lego.