Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. deficiam Scythicum metuens pontumque polumque[*](Deficiam scyth. Par. M, Deficiamus cyth. V | pontumque polumque Par. C, potumque cretamque V )
  2. nec de te credam nostris ingrata serenis.
  3. da, precor, amplexus haesuraque verba relinque
  4. auribus et dulci iam nunc preme lumina dextra.'
  5. talibus Alcimede maeret; sed fortior Aeson
  6. attollens dictis animos: 'o si mihi sanguis,
  7. quantus erat, cum signiferum cratera minantem[*](signiferum cratera (cratẽ M 2) minantem CM 2, signifera cratera sinaut V )
  8. non leviore Pholum[*](Pholum Sabellicus, tholum V, tolum C ) manus haec compescuit auro,
  9. primus in aeratis posuissem puppibus arma
  10. concussoque ratem gauderem tollere remo.
  11. sed patriae valuere preces auditaque magnis
  12. vota deis: video[*](video T 1 Parrhasius, ut deque V (olim ex VIDEQ), ut dent C ) nostro tot in aequore reges
  13. teque ducem. tales, tales ego ducere suetus
  14. atque sequi. nunc ille dies (det Iuppiter oro),
  15. ille super, quo te Scythici regisque marisque
  16. victorem atque umeros ardentem vellere rapto
  17. accipiam cedamque tuae mea facta iuventae.'
  18. sic ait. ille suo conlapsam pectore matrem
  19. sustinuit magnaque senem cervice recepit.
  20. Et iam finis erat. Zephyrumque ratemque morantis