Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Quas autem comitem te rapto per undas?
  2. quamquam et si gelidas irem mansurus ad Arctos
  3. vel super Hesperiae vada caligantia Thyles
  4. aut septemgemini caput haud penetrabile Nili,
  5. hortarere vias. etenim tua—nempe benigna
  6. quam mihi sorte Venus iunctam florentibus annis
  7. servat et in senium—, tua, quae me vulnere primo
  8. intactum thalamis et adhuc iuvenile vagantem
  9. fixisti, tua frena libens docilisque recepi,
  10. et semel insertas non mutaturus habenas
  11. usque premo, tu me nitidis Albana ferentem
  12. dona comis sancteque indutum Caesaris auro
  13. visceribus complexa tuis sertisque dedisti
  14. oscula anhela meis; tu, cum Capitolia nostrae
  15. infitiata lyrae, saevum ingratumque dolebas [*]()
  16. mecum victa Iovem; tu procurrentia primis
  17. carmina nostra sonis totasque in murmure noctes
  18. aure rapis vigili; longi tu sola laboris
  19. conscia, cumque tuis crevit mea Thebais annis,
  20. qualem te nuper Stygias prope raptus ad umbras,