Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. nondum pulchra ducis clementia coeperat ortu
  2. intactos servare mares; nunc frangere sexum
  3. atque hominem mutare nefas, gavisaque solos
  4. quos genuit natura videt, nec lege sinistra
  5. ferre timent famulae natorum pondera matres.
  6. Tu quoque nunc iuvenis, genitus si tardius esses,
  7. umbratusque genas et adultos fortior artus,
  8. non unum gaudens Phoebea ad limina munus
  9. misisses; patrias nunc solus crinis ad oras
  10. naviget. hunc multo Paphie saturabat amomo,
  11. hunc nova tergemina pectebat Gratia dextra;
  12. huic et purpurei cedet coma saucia Nisi,
  13. et quam Sperchio tumidus servabat Achilles.
  14. ipsi, cum primum niveam praecerpere frontem
  15. decretum est umerosque manu nudare nitentes,
  16. adcurrunt teneri Paphia cum matre volucres
  17. expediuntque comas et Serica pectore ponunt
  18. pallia, tunc iunctis crinem incidere sagittis
  19. atque auro gemmisque locant, rapit ipsa cadentem
  20. mater et arcanos iterat Cytherea liquores.[*]()