Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. cui daberis.’ sic orsa leves secum ipsa per auras
  2. tollit olorinaque iubet considere biga.
  3. nec mora. iam Latii montes veterisque penates
  4. Evandri, quos mole nova pater inclitus orbis
  5. excolit et summis aequat Germanicus astris.
  6. tunc propior iam cura deae, quae forma capillis
  7. optima, quae vestis roseos accendere vultus
  8. apta, quod in digitis, collo quod dignius aurum.
  9. norat caelestis oculos ducis ipsaque taedas
  10. iunxerat et plena dederat conubia dextra:
  11. sic ornat crines, Tyrios sic fundit amictus,
  12. dat radios ignemque suum. cessere priores
  13. deliciae famulumque greges; hic pocula magno
  14. prima duci murrasque graves crystallaque portat
  15. candidiore manu: crescit nova gratia Baccho.
  16. Care puer superis, qui praelibare verendum
  17. nectar et ingentem totiens contingere dextram
  18. electus, quam nosse Getae, quam tangere Persae
  19. Armeniique Indique petunt! o sidere dextro
  20. edite, multa tibi divum indulgentia favit!