Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. aspiciunt et uterque probant, nec tanta potenti
  2. terrarum domino divum sine mente voluptas.
  3. Dicitur Idalios Erycis de vertice lucos
  4. dum petit et molles agitat Venus aurea cygnos,
  5. Pergameas intrasse domos, ubi maximus aegris
  6. auxiliator adest et festinantia sistens
  7. fata salutifero mitis deus incubat angui.
  8. hic puerum egregiae praeclarum sidere formae
  9. ipsius ante dei ludentem conspicit aras.
  10. ac primum subita paulum decepta figura
  11. natorum de plebe putat; sed non erat illi
  12. arcus et ex umeris nullae fulgentibus umbrae.
  13. miratur puerile decus vultumque comasque
  14. aspiciens tune Ausonias ait ‘ibis ad arces,
  15. neglectus Veneri? tu sordida tecta iugumque
  16. servitii vulgare feres? procul absit: ego isti,
  17. quem meruit, formae dominum dabo. vade age mecum,
  18. vade, puer: ducam volucri per sidera curru
  19. donum immane duci; nec te plebeia manebunt
  20. iura: Palatino famulus deberis amori, nil ego,