Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. stipentur cineres: nos non arsura feremus
  2. munera, venturosque tuus durabit in annos
  3. me monstrante dolor, neque enim mihi flere parentem
  4. ignotum, similis gemui proiectus ad ignem.
  5. ille mihi tua damna dies compescere cantu
  6. suadet: et ipse tuli quos nunc tibi confero questus.
  7. Non tibi clara quidem, senior placidissime, gentis
  8. linea nec proavis demissum stemma, sed ingens
  9. supplevit fortuna genus culpamque parentum
  10. occuluit. nec enim dominos de plebe tulisti,
  11. sed quibus occasus pariter famulantur et ortus,
  12. nec pudor iste tibi: quid enim terrisque poloque
  13. parendi sine lege manet? vice cuncta reguntur [*]()
  14. alternisque premunt, propriis sub regibus omnis
  15. terra; premit felix regum diademata Roma;
  16. hanc ducibus frenare datum; mox crescit in illos
  17. imperium superis, sed habent et numina legem:
  18. servit et astrorum velox chorus et vaga servit
  19. luna nec iniussae totiens redit orbita lueis,
  20. et—modo si fas est aequare iacentia summis—