Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. erravit seu blanda diu Fortuna regressum
  2. maluit—attonitum et venturi fulminis ictus
  3. horrentem tonitru tantum lenique procella
  4. contentus monuisse senem; cumque horrida supra
  5. aequora curarum socius procul Itala rura
  6. linqueret, hic molles Campani litoris oras
  7. et Diomedeas concedere iussus in arces
  8. atque hospes, non exsul, erat. nec longa moratus
  9. Romuleum reseras iterum, Germanice, limen
  10. maerentemque foves inclinatosque penates
  11. erigis. haud mirum, ductor placidissime, quando
  12. haec est quae victis parcentia foedera Cattis
  13. quaeque suum Dacis donat clementia montem,
  14. quae modo Marcomanos post horrida bella vagosque
  15. Sauromatas Latio non est dignata triumpho.
  16. Iamque in fine dies et inexorabile pensum
  17. deficit, hic maesti pietas me poscit Etrusci,
  18. qualia nec Siculae moderantur carmina rupes
  19. nec fati iam certus olor saevique marita
  20. Tereos. heu quantis lassantem brachia vidi