Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. hinc tibi rara quies animoque exclusa voluptas,
  2. exiguaeque dapes et numquam laesa profundo
  3. cura mero; sed iura tamen genialia cordi
  4. et mentem vincire toris ac iungere festa
  5. conubia et fidos domino genuisse clientes.
  6. Quis sublime genus formamque insignis Etruscae
  7. nesciat? haud quamquam proprio mihi cognita visu,
  8. sed decus eximium famae par reddit imago,
  9. vultibus et similis [*]() natorum gratia monstrat,
  10. nec vulgare genus; fasces summamque curulem
  11. frater et Ausonios enses mandataque fidus
  12. signa tulit, cum prima truces amentia Dacos
  13. impulit et magno gens est damnata triumpho,
  14. sic quicquid patrio cessatum a sanguine, mater
  15. reddidit, obscurumque latus clarescere vidit
  16. conubio gavisa domus, nec pignora longe;
  17. quippe bis ad partus venit Lucina manuque
  18. ipsa levi gravidos tetigit fecunda labores,
  19. felix a! si longa dies, si cernere vultus
  20. natorum viridesque genas tibi iusta dedissent