Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ibo nec egrediar nisi iam cedente carina.[*]()
  2. Quis rude et abscissum miseris animantibus aequor
  3. fecit iter solidaeque pios telluris alumnos
  4. expulit in fluctus pelagoque immisit hianti
  5. audax ingenii? nec enim temeraria virtus
  6. illa magis, summae gelidum quae Pelion Ossae
  7. iunxit anhelantemque iugis bis pressit Olympum.
  8. usque adeone parum lentas transire paludes
  9. stagnaque et angustos summittere pontibus amnes?
  10. imus in abruptum gentilesque undique terras
  11. fugimus exigua clausi trabe et aere nudo.
  12. inde furor ventis indignataeque procellae
  13. et caeli fremitus et fulmina plura Tonanti.
  14. ante rates pigro torpebant aequora somno,
  15. nec spumare Thetis nec spargere nubila fluctus
  16. audebant, visis tumuerunt puppibus undae,
  17. inque hominem surrexit hiems, tune nubila Plias
  18. Oleniumque pecus, solito tune peior Orion,
  19. iusta queror; fugit ecce vagas ratis acta per undas
  20. paulatim minor et longe servantia vincit