Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. delituit caelum et subitis lux candida cessit
  2. nubibus ac tenuis graviore favonius austro
  3. immaduit; qualem Libyae Saturnia nimbum
  4. attulit, Iliaco dum dives Elissa marito
  5. donatur testesque ululant per devia nymphae.
  6. diffugimus. festasque dapes redimitaque vina
  7. abripiunt famuli: nec quo convivia migrent,
  8. quamvis innumerae gaudentia rura superne
  9. insedere domus et multo culmine dives
  10. mons nitet: instantes sed proxima quaerere nimbi
  11. suadebant laesique fides reditura sereni.
  12. stabat dicta sacri tenuis casa nomine templi
  13. et magnum Alciden humili lare parva premebat,
  14. fluctivagos nautas scrutatoresque profundi
  15. vix operire capax, huc omnis turba coimus,
  16. huc epulae ditesque tori coetusque ministrum
  17. stipantur nitidaeque cohors gratissima Pollae.
  18. non cepere fores, angustaque deficit aedes.
  19. erubuit risitque deus dilectaque Polli
  20. corda subit blandisque virum complectitur ulnis.