Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ne pudeat; rumpat frenos dolor iste diesque,[*]()
  2. si tam dura placent—hominem [*]() gemis—heu mihi! subdo
  3. ipse faces—, hominem, Urse, tuum, cui dulce volenti
  4. servitium, cui triste nihil, qui sponte sibique
  5. imperiosus erat. quisnam haec in funera missos
  6. castiget luctus? gemit inter bella peremptum
  7. Parthus equum, fidosque canes flevere Molossi,
  8. et volucres habuere rogum cervusque Maronem.
  9. quid, si nec famulus? vidi ipse habitusque notavi
  10. te tantum cupientis erum; sed maior in ore
  11. spiritus et tenero manifesti in sanguine mores.
  12. optarent multum Graiae cuperentque Latinae
  13. sic peperisse nurus, non talem Cressa superbum
  14. callida sollicito revocavit Thesea filo,
  15. nec Paris Oebalios talis visurus amores
  16. rusticus invitas deiecit in aequora pinus.
  17. non fallo aut cantus adsueta licentia ducit:
  18. vidi et adhuc video, qualem nec bella canentem
  19. litore virgineo Thetis occultavit Achillen,
  20. nec circum saevi fugientem moenia Phoebi