Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. quid faceret subito deceptus praedo? nec altis
  2. credere corpus aquis hirtae sibi conscius audet
  3. pellis et a tenero nandi rudis: omnia questus,
  4. immitem Bromium,[*]() stagna invida et invida tela,
  5. primaevam visu platanum, cui longa propago
  6. innumeraeque manus et iturus in aethera vertex,
  7. deposuit iuxta vivamque adgessit harenam
  8. optatisque aspergit aquis et talia mandat:
  9. ‘vive diu nostri pignus memorabile voti,
  10. arbor, et haec durae latebrosa cubilia nymphae
  11. tu saltem declinis ama, preme frondibus undam.
  12. illa quidem meruit, sed ne, precor, igne superno
  13. aestuet aut dura feriatur grandine; tantum
  14. spargere tu laticem et foliis turbare memento.
  15. tunc ego teque diu recolam dominamque benignae
  16. sedis et inlaesa tutabor utramque senecta,
  17. ut Iovis, ut Phoebi frondes, ut discolor umbra
  18. populus et nostrae stupeant tua germina pinus.’
  19. sic ait. illa dei veteres animata calores
  20. uberibus stagnis obliquo pendula trunco