Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. hinc atque hinc curvas perrumpunt aequora rupes,
  2. dat natura locum montique intervenit unum [*]()
  3. litus et in terras scopulis pendentibus exit.
  4. gratia prima loci, gemina testudine fumant
  5. balnea, et e terris occurrit dulcis amaro
  6. nympha mari. levis hic Phorci chorus udaque crines
  7. Cymodoce viridisque cupit Galatea lavari.
  8. ante domum tumidae moderator caerulus undae
  9. excubat, innocui custos laris: huius amico
  10. spumant templa salo. felicia rura tuetur
  11. Alcides; gaudet gemino sub numine portus:
  12. hic servat terras, hic saevis fluctibus obstat.
  13. mira quies pelagi: ponunt hic lassa furorem
  14. aequora, et insani spirant clementius austri,
  15. hic praeceps minus audet hiems, nulloque tumultu
  16. stagna modesta iacent dominique imitantia mores.
  17. Inde per obliquas erepit porticus arces,
  18. urbis opus, longoque domat saxa aspera dorso,
  19. qua prius obscuro permixti pulvere soles
  20. et feritas inamoena viae, nunc ire voluptas: