Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. astra salutantem dominus sibi mente dicavit,
  2. amplexusqne sinu tulit et genuisse putavit,
  3. fas mihi sanctorum venia dixisse parentum,
  4. tuque, oro, Natura, sinas, cui prima per orbem
  5. iura animis sancire datum: non omnia sanguis
  6. proximus aut serie generis demissa propago
  7. alligat; interius nova saepe adscitaque serpunt
  8. pignora conexis. natos genuisse necesse est,
  9. elegisse iuvat, tenero sic blandus Achilli
  10. semifer Haemonium vincebat Pelea Chiron,
  11. nec senior Peleus natum comitatus in arma
  12. Troica, sed claro Phoenix haerebat alumno.
  13. optabat longe reditus Pallantis ovantis
  14. Evander, fidus pugnas spectabat Acoetes.
  15. cumque procul nitidis genitor cessaret ab astris,
  16. fluctivagus volucrem comebat Persea Dictys.
  17. quid referam altricum victas pietate parentes?
  18. quid te post cineres deceptaque funera matris
  19. tutius Inoo reptantem pectore, Baeche?
  20. iam secura patris Tuscis regnabat in undis