Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Quae tibi sollicitus persolvit praemia morum
  2. Urbis amor! quae tum patrumque equitumque notavi
  3. lumina et ignarae plebis lugere potentes?
  4. non labente Numa timuit sic Curia felix
  5. Pompeio nec celsus eques nec femina Bruto.
  6. hoc illud: tristes invitum audire catenas,
  7. parcere verberibus nec qua iubet alta potestas
  8. ire, sed armatas multum sibi demere vires
  9. dignarique manus humiles et verba precantum,
  10. reddere iura foro nec proturbare curules
  11. et ferrum mulcere toga. sic itur in alta
  12. pectora, sic mixto reverentia Adit amori.
  13. ipsa etiam cunctos gravis inclementia fati
  14. terruit et subiti praeceps iuvenile pericli,
  15. nil cunctante malo. non illud culpa senectae
  16. —quippe ea bissenis vixdum orsa excedere lustris—,
  17. sed labor intendens animique in membra vigentis
  18. imperium vigilesque suo pro Caesare curae,
  19. dulce opus. hinc fessos penitus subrepsit in artus
  20. insidiosa quies et pigra oblivio vitae.