Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. exuvias Diana tholo captivaque tela
  2. Bellipotens: nec tu. quando tibi, Gallice, maius
  3. eloquium, fandique opibus sublimis abundas.
  4. sperne coli tenuiore lyra. vaga cingitur astris
  5. luna. et in oceanum rivi cecidere minores.
  6. Quae tibi sollicitus persolvit praemia morum
  7. Urbis amor! quae tum patrumque equitumque notavi
  8. lumina et ignarae plebis lugere potentes?
  9. non labente Numa timuit sic Curia felix
  10. Pompeio nec celsus eques nec femina Bruto.
  11. hoc illud: tristes invitum audire catenas,
  12. parcere verberibus nec qua iubet alta potestas
  13. ire, sed armatas multum sibi demere vires
  14. dignarique manus humiles et verba precantum,
  15. reddere iura foro nec proturbare curules
  16. et ferrum mulcere toga. sic itur in alta
  17. pectora, sic mixto reverentia Adit amori.
  18. ipsa etiam cunctos gravis inclementia fati
  19. terruit et subiti praeceps iuvenile pericli,
  20. nil cunctante malo. non illud culpa senectae