Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Pieriosque dies et habentes carmina somnos,
  2. litus utrumque domi, nec te mitissimus amnis
  3. dividit, alternas servant, praetoria ripas,
  4. non externa sibi fluviumve obstare [*]() queruntur.
  5. Sestiacos nunc Fama sinus pelagusque natatum
  6. iactet et audaci victos delphinas ephebo!
  7. hic aeterna quies, nullis hic iura procellis,
  8. numquam fervor aquis, datur hic transmittere visus
  9. et voces et paene manus, sic Chalcida fluetus
  10. expellunt reflui. sic dissociata profundo
  11. Bruttia Sicanium circumspicit ora Pelorum.
  12. Quid primum mediumve canam, quo fine quiescam?
  13. auratasne trabes an Mauros undique postes
  14. an picturata lucentia marmora vena
  15. mirer. an emissas per cuncta cubilia nymphas?
  16. huc oculis, huc mente trahor. venerabile dicam
  17. lucorum senium? te, quae vada fluminis infra
  18. cernis, an ad silvas quae respicis, aula, tacentis,
  19. qua tibi tota quies offensaque turbine nullo
  20. nox silet et teneros invitant [*]() murmura somnos?