Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Hippomenes, nec sic meta pallebat in ipsa;
  2. vidi et Abydeni iuvenis certantia remis
  3. bracchia laudavique manus et saepe natanti
  4. praeluxi: minor ille calor, quo saeva tepebant
  5. aequora: tu veteres, iuvenis, transgressus amores,
  6. ipse ego te tantos stupui durasse per aestus
  7. firmavique animos blandisque madentia plumis
  8. lumina detersi. quotiens mihi questus Apollo,
  9. sic vatem maerere suum! iam, mater, amatos
  10. indulge thalamos, noster comes ille piusque
  11. signifer; armiferos poterat memorare labores
  12. claraque facta virum et torrentes sanguine campos,
  13. sed tibi plectra dedit mitisque incedere vates
  14. maluit et nostra laurum subtexere myrto.
  15. hic iuvenum lapsus suaque aut externa revolvit
  16. vulnera; pro! quanta est Paphii reverentia, mater,
  17. numinis: hic nostrae deflevit fata columbae.’
  18. Finierat 1; tenera matris cervice pependit
  19. blandus et admotis tepefecit pectora pennis,
  20. illa refert vultu non aspernata rogari: