Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ferre iugum et longos iussi sperare per annos,
  2. ast illam summa leviter—sic namque iubebas—
  3. lampade parcentes et inerti strinximus arcu.
  4. ex illo quantos iuvenis premat anxius ignes,
  5. testis ego attonitus, quantum me nocte dieque
  6. urgentem ferat, haud ulli vehementior umquam
  7. incubui, genetrix, iterataque vulnera fodi.
  8. vidi ego et immiti cupidum decurrere campo
  9. Hippomenes, nec sic meta pallebat in ipsa;
  10. vidi et Abydeni iuvenis certantia remis
  11. bracchia laudavique manus et saepe natanti
  12. praeluxi: minor ille calor, quo saeva tepebant
  13. aequora: tu veteres, iuvenis, transgressus amores,
  14. ipse ego te tantos stupui durasse per aestus
  15. firmavique animos blandisque madentia plumis
  16. lumina detersi. quotiens mihi questus Apollo,
  17. sic vatem maerere suum! iam, mater, amatos
  18. indulge thalamos, noster comes ille piusque
  19. signifer; armiferos poterat memorare labores
  20. claraque facta virum et torrentes sanguine campos,