Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. hunc egomet tota quondam—tibi dulce—pharetra
  2. improbus et densa trepidantem cuspide fixi.
  3. quamvis Ausoniis multum gener ille petitus
  4. matribus, edomui victum dominaeque potentis
  5. ferre iugum et longos iussi sperare per annos,
  6. ast illam summa leviter—sic namque iubebas—
  7. lampade parcentes et inerti strinximus arcu.
  8. ex illo quantos iuvenis premat anxius ignes,
  9. testis ego attonitus, quantum me nocte dieque
  10. urgentem ferat, haud ulli vehementior umquam
  11. incubui, genetrix, iterataque vulnera fodi.
  12. vidi ego et immiti cupidum decurrere campo
  13. Hippomenes, nec sic meta pallebat in ipsa;
  14. vidi et Abydeni iuvenis certantia remis
  15. bracchia laudavique manus et saepe natanti
  16. praeluxi: minor ille calor, quo saeva tepebant
  17. aequora: tu veteres, iuvenis, transgressus amores,
  18. ipse ego te tantos stupui durasse per aestus
  19. firmavique animos blandisque madentia plumis
  20. lumina detersi. quotiens mihi questus Apollo,