Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. felices utrosque vocant, sed in agmine, plures
  2. invidere viro. iamdudum poste reclinis
  3. quaerit Hymen thalamis intactum dicere carmen,
  4. quo vatem mulcere queat, dat Iuno verenda
  5. vincula et insignit gemina [*]() Concordia taeda.
  6. hic fuit ille dies: noctem canat ipse maritus!
  7. quantum nosse licet, sic victa sopore doloso
  8. Martia fluminea posuit latus Ilia ripa;
  9. non talis niveos tinxit [*]() Lavinia vultus,
  10. cum Turno spectante rubet: non Claudia talis
  11. respexit populos mota iam virgo carina.
  12. Nunc opus. Aonidum comites tripodumque ministri,
  13. diversis certare modis: eat enthea vittis
  14. atque hederis redimita cohors, ut pollet ovanti
  15. quisque lyra. sed praecipui, qui nobile gressu
  16. extremo fraudatis opus. date carmina festis
  17. digna toris, hunc ipse Coo plaudente Philetas
  18. Callimachusque senex Umbroque Propertius antro
  19. ambissent laudare diem, nec tristis in ipsis
  20. Naso Tomis divesque foco lucente Tibullus.