Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. claraque gaudentes plauserunt limina cygni.
  2. digna deae sedes, nitidis nec sordet ab astris.
  3. hic Libycus Phrygiusque silex, hic dura Laconum
  4. saxa virent. hic flexus onyx et concolor alto
  5. vena mari rupesque nitent. quis purpura saepe
  6. Oebalis et Tyrii moderator livet aeni.
  7. pendent innumeris fastigia nixa columnis,
  8. robora Dalmatico lucent satiata metallo.
  9. excludunt radios silvis demissa vetustis
  10. frigora, perspicui vivunt in marmore fontes.
  11. nec servat natura vices: hic Sirius alget,
  12. bruma tepet versumque domus sibi temperat annum.
  13. Exsultat visu tectisque potentis alumnae
  14. non secus alma Venus, quam si Paphon aequore ab alto
  15. Idaliasque domos Erycinaque templa subiret.
  16. tunc ipsam solo reclinem adfata cubili:
  17. ‘Quonam hic usque sopor vacuique modestia lecti,
  18. o mihi Laurentes inter dilecta puellas?
  19. quis morum fideique modus? numquamne virili
  20. summittere iugo? veniet iam tristior aetas.