Thebais

Statius, P. Papinius (Publius Papinius)

Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.

  1. corda negant diraque nefas minitantia vena.
  2. ire tamen vacuoque sedet petere omina caelo.
  3. Mons erat audaci seductus in aethera dorso—
  4. nomine Lernaei memorant Aphesanta coloni—,
  5. gentibus Argolicis olim sacer; inde ferebant
  6. nubila suspenso celerem temerasse volatu
  7. Persea, cum raptos pueri perterrita mater
  8. prospexit de rupe gradus ac paene secuta est.
  9. huc gemini vates sanctam canentis olivae
  10. fronde comam et niveis ornati tempora vittis
  11. evadunt pariter, madidos ubi lucidus agros
  12. ortus et algentes laxavit sole pruinas,
  13. ac prior Oeclides solitum prece numen amicat:
  14. ‘Iuppiter omnipotens—nam te pernicibus alis
  15. addere consilium volucresque implere futuri
  16. omniaque et causas caelo deferre latentes
  17. accipimus—, non Cirrha deum promiserit antro
  18. certius, aut frondes lucis quas fama Molossis
  19. Chaonias sonuisse tibi: licet aridus Hammon
  20. invideat Lyciaeque parent contendere sortes