Thebais

Statius, P. Papinius (Publius Papinius)

Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.

  1. aeque valent: tantum miserae dolor ultimus addit
  2. robur, et exsangues crudescunt luctibus anni.
  3. iamque decus galeae, iam spicula saeva ligabat
  4. ductor et ad lituos hilarem intrepidumque tubarum
  5. prospiciebat equum, subito cum apparuit ingens
  6. mater, et ipse metu famulumque expalluit omnis
  7. coetus, et oblatam retro dedit armiger hastam.
  8. ‘quis furor? unde iterum regni integrata resurgit
  9. Eumenis? ipsi etiam post omnia, comminus ipsi
  10. stabitis? usque adeo geminas duxisse cohortes
  11. et facinus mandasse parum est? quo deinde redibit
  12. victor? in hosne sinus? o diri coniugis olim
  13. felices tenebrae! datis, improba lumina, poenas,
  14. haec spectanda dies? quo, saeve, minantia flectis
  15. ora? quid alternus voltus pallorque ruborque
  16. mutat, et obnixi frangunt mala murmura dentes?
  17. me miseram, vinces! prius haec tamen arma necesse est
  18. experiare domi: stabo ipso in limine portae
  19. auspicium infelix scelerumque immanis imago.
  20. haec tibi canities, haec sunt calcanda, nefande,