Epistulae

Seneca, Lucius Annaeus

Seneca, Lucius Annaeus, ca. 4 B.C.-65 A.D, creator; Gummere, Richard M. (Richard Mott), 1883-, editor

Otiosi videmur, et non sumus. Nam si bona fide sumus, si receptui cecinimus, si speciosa contemnimus, ut paulo ante dicebam, nulla res nos avocabit, nullus hominum aviumque concentus interrumpet cogitationes bonas, solidasque iam et certas.

Leve illud ingenium est nec sese adhuc reduxit introrsus, quod ad vocem et accidentia erigitur. Habet intus aliquid sollicitudinis et habet aliquid concepti

v1.p.380
pavoris, quod illum curiosum facit, ut ait Vergilius noster:
  1. Et me, quem dudum non ulla iniecta movebant
  2. Tela neque adverso glomerati ex agmine Grai,
  3. Nunc omnes terrent aurae, sonus excitat omnis
  4. Suspensum et pariter comitique onerique timentem.