Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Inops, potentem dum vult imitari, perit.
  2. In prato quondam rana conspexit bovem
  3. Et tacta invidia tantae magnitudinis
  4. Rugosam inflavit pellem: tum natos suos
  5. Interrogavit, an bove esset latior.
  6. Illi negarunt. Rursus intendit cutem
  7. Maiore nisu et simili quaesivit modo,
  8. Quis maior esset. Illi dixerunt bovem.
  9. Novissime indignata dum vult validius
  10. Inflare sese, rupto iacuit corpore.
  1. Consilia qui dant prava cautis hominibus,
  2. Et perdunt operam et deridentur turpiter.
  3. Canes currentes bibere in Nilo flumine,
  4. A corcodilis ne rapiantur, traditum est.
  5. Igitur cum currens bibere coepisset canis,
  6. Sic corcodilus: Quamlibet lambe otio;
  7. Noli vereri. At ille: Facerem mehercule,
  8. Nisi esse scirem carnis te cupidum meae.
  1. Nulli nocendum: si quis vero laeserit,