Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. haec modo te populo reddentem iura videbit,
  2. et se secreto [*](secretis correxi, cf. v.31) finget adesse tuis .
  3. nunc longi reditus hastae supponere lustri
  4. credet, et exacta cuncta locare fide:
  5. nunc facere in medio facundum verba senatu,
  6. publica quaerentem quid petat utilitas:
  7. nunc pro Caesaribus superis decernere grates,
  8. albave opimorum colla ferire boum.
  9. atque utinam, cum iam fueris potiora precatus,
  10. ut mihi placetur principis ira roges!
  11. surgat ad hanc vocem plena pius ignis ab ara,
  12. detque bonum voto lucidus omen apex.
  13. interea, qua parte licet, ne cuncta queramur,
  14. hic quoque te festum consule tempus agam.
  15. altera laetitiae est nec cedens causa priori,
  16. successor tanti frater honoris erit.
  17. nam tibi finitum summo, Graecine, Decembri
  18. imperium Iam suscipit ille die.
  19. quaeque est in vobis pietas, alterna feretis
  20. gaudia, tu fratris fascibus, ille tuis.