Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. obruit audentem rerum gravitasque nitorque,
  2. nec potui coepti pondera ferre mei.
  3. illic, quam laudes, erit officiosa voluntas:
  4. cetera materia debilitata iacent,
  5. qui si forte liber vestras pervenit ad auris,
  6. tutelam mando sentiat ille tuam.
  7. hoc tibi facturo, vel si non ipse rogarem,
  8. accedat cumulus gratia nostra levis,
  9. non ego laudandus, sed sunt tua pectora, lacte
  10. et non calcata candidiora nive:
  11. mirarisque alios, cum sis mirabilis ipse,
  12. nec lateant artes eloquiumque tuum.
  13. te iuvenum princeps, cui dat Germania nomen,
  14. participem studii Caesar habere solet.
  15. tu comes antiquus, tu primis iunctus ab annis
  16. ingenio mores aequiperante places.
  17. te dicente prius fit protinus impetus illi:
  18. teque habet elicias qui sua verba tuis.
  19. cum tu desisti mortaliaque ora quierunt
  20. tectaque non longa continuere mora,