Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. serus ab Iliacis et post Antenora flammis
  2. attulit Aeneas in loca nostra deos.
  3. huius erat Solymus Phrygia comes unus ab Ida,
  4. a quo Sulmonis moenia nomen habent,
  5. Sulmonis gelidi, patriae, Germanice, nostrae.
  6. me miserum, Scythico quam procul illa solo est!
  7. ergo ego tam longe—sed subprime, Musa, querellas!
  8. non tibi sunt maesta sacra canenda lyra.
  9. quo non livor adit? sunt qui tibi mensis honorem
  10. eripuisse velint invideantque, Venus,
  11. nam quia ver aperit tunc omnia, densaque cedit
  12. frigoris asperitas, fetaque terra patet,
  13. Aprilem memorant ab aperto tempore dictum,
  14. quem Venus iniecta vindicat alma manu.
  15. illa quidem totum dignissima temperat orbem;
  16. illa tenet nullo regna minora deo,
  17. iuraque dat caelo, terrae, natalibus undis,
  18. perque suos initus continet omne genus.
  19. illa deos omnes (longum est numerare) creavit:
  20. illa satis causas arboribusque dedit: