Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. et pecus ante diem partus edebat acerbos,
  2. agnaque nascendo saepe necabat ovem.
  3. silva vetus nullaque diu violata securi
  4. stabat, Maenalio sacra relicta deo:
  5. ille dabat tacitis animo responsa quieto
  6. noctibus, hic geminas rex Numa mactat oves.
  7. prima cadit Fauno, leni cadit altera Somno:
  8. sternitur in duro vellus utrumque solo.
  9. bis caput intonsum fontana spargitur unda,
  10. bis sua faginea tempora fronde tegit,
  11. usus abest Veneris, nec fas animalia mensis
  12. ponere, nec digitis anulus ullus inest,
  13. veste rudi tectus supra nova vellera corpus
  14. ponit, adorato per sua verba deo.