Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. nec foret Othryades congestis lectus in armis,
  2. o quantum patriae sanguinis ille dedit!
  3. quid, nova cum fierent Capitolia? nempe deorum
  4. cuncta Iovi cessit turba locumque dedit:
  5. Terminus, ut veteres memorant, inventus in aede
  6. restitit et magno cum Iove templa tenet.
  7. nunc quoque, se supra ne quid nisi sidera cernat,
  8. exiguum templi tecta foramen habent.
  9. ermine, post illud levitas tibi libera non est:
  10. qua positus fueris in statione, mane,
  11. nec tu vicino quicquam concede roganti,
  12. ne videare hominem praeposuisse Iovi;
  13. et seu vomeribus seu tu pulsabere rastris,
  14. clamato tuus est hic ager, ille suus!
  15. est via, quae populum Laurentes ducit in agros,
  16. quondam Dardanio regna petita duci:
  17. illa lanigeri pecoris tibi, Termine, fibris
  18. sacra videt fieri sextus ab urbe lapis,
  19. gentibus est aliis tellus data limite certo:
  20. Romanae spatium est urbis et orbis idem.