Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. ut tetigit lucum (densa niger ilice lucus,
  2. in medio gelidae fons erat altus aquae),
  3. hic ait in silva, virgo Tegeaea, lavemur!
  4. erubuit falso virginis illa sono.
  5. dixerat et nymphis: nymphae velamina ponunt, note
  6. hanc pudet et tardae dat mala signa morae,
  7. exuerat tunicas; uteri manifesta tumore
  8. proditur indicio ponderis ipsa suo.
  9. cui dea ‘virgineos, periura Lycaoni, coetus
  10. desere nec castas pollue’ dixit aquas.
  11. luna novum decies implerat cornibus orbem:
  12. quae fuerat virgo credita, mater erat.
  13. laesa furit Iuno, formam mutatque puellae.
  14. quid facis? invito est pectore passa Iovem,
  15. utque ferae vidit turpes in paelice voltus,
  16. huius in amplexus Iuppiter inquit eat!
  17. ursa per incultos errabat squalida montes,
  18. quae fuerat summo nuper amata Iovi.
  19. iam tria lustra puer furto conceptus agebat,
  20. cum mater nato est obvia facto suo.