Ars Amatoria

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Oesypa quid redolent? quamvis mittatur Athenis
  2. Demptus ab inmundo vellere sucus ovis.
  3. Nec coram mixtas cervae sumpsisse medullas,
  4. Nec coram dentes defricuisse probem;
  5. Ista dabunt formam, sed erunt deformia visu:
  6. Multaque, dum fiunt, turpia, facta placent;
  7. Quae nunc nomen habent operosi signa Myronis
  8. Pondus iners quondam duraque massa fuit;
  9. Anulus ut fiat, primo conliditur aurum;
  10. Quas geritis vestis, sordida lana fuit;
  11. Cum fieret, lapis asper erat: nunc, nobile signum,
  12. Nuda Venus madidas exprimit imbre comas.