Ars Amatoria

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Hanc placet ornari testudine Cyllenea:
  2. Sustineat similes fluctibus illa sinus.
  3. Sed neque ramosa numerabis in ilice glandes,
  4. Nec quot apes Hyblae, nec quot in Alpe ferae,
  5. Nec mihi tot positus numero conprendere fas est:
  6. Adicit ornatus proxima quaeque dies.
  7. Et neglecta decet multas coma; saepe iacere
  8. Hesternam credas; illa repexa modo est.
  9. Ars casum simulat; sic capta vidit ut urbe
  10. Alcides Iolen, 'hanc ego' dixit 'amo.'
  11. Talem te Bacchus Satyris clamantibus euhoe
  12. Sustulit in currus, Cnosi relicta, suos.
  13. O quantum indulget vestro natura decori,
  14. Quarum sunt multis damna pianda modis!
  15. Nos male detegimur, raptique aetate capilli,
  16. Ut Borea frondes excutiente, cadunt.
  17. Femina canitiem Germanis inficit herbis,
  18. Et melior vero quaeritur arte color: