Ars Amatoria

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Pauper amet caute: timeat maledicere pauper,
  2. Multaque divitibus non patienda ferat.
  3. Me memini iratum dominae turbasse capillos:
  4. Haec mihi quam multos abstulit ira dies!
  5. Nec puto, nec sensi tunicam laniasse; sed ipsa
  6. Dixerat, et pretio est illa redempta meo.
  7. At vos, si sapitis, vestri peccata magistri
  8. Effugite, et culpae damna timete meae.
  9. Proelia cum Parthis, cum culta pax sit amica,
  10. Et iocus, et causas quicquid amoris habet.
  11. Si nec blanda satis, nec erit tibi comis amanti,
  12. Perfer et obdura: postmodo mitis erit.
  13. Flectitur obsequio curvatus ab arbore ramus:
  14. Frangis, si vires experiere tuas.
  15. Obsequio tranantur aquae: nec vincere possis
  16. Flumina, si contra, quam rapit unda, nates.
  17. Obsequium tigresque domat Numidasque leones;
  18. Rustica paulatim taurus aratra subit.
  19. Quid fuit asperius Nonacrina Atalanta?
  20. Succubuit meritis trux tamen illa viri.