Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Flava Ceres, tenues spicis redimita capillos,
  2. Cur inhibes sacris commoda nostra tuis?
  3. Te, dea, munificam gentes, ubi quaeque, loquuntur,
  4. Nec minus humanis invidet ulla bonis.
  5. Ante nec hirsuti torrebant farra coloni,
  6. Nec notum terris area nomen erat,
  7. Sed glandem quercus, oracula prima, ferebant;
  8. Haec erat et teneri caespitis herba cibus.
  9. Prima Ceres docuit turgescere semen in agris
  10. Falce coloratas subsecuitque comas;
  11. Prima iugis tauros supponere colla coegit,
  12. Et veterem curvo dente revellit humum.
  13. Hanc quisquam lacrimis laetari credit amantum
  14. Et bene tormentis secubituque coli?
  15. Nec tamen est, quamvis agros amet illa feraces,
  16. Rustica nec viduum pectus amoris habet.
  17. Cretes erunt testes — nec fingunt omnia Cretes.
  18. Crete nutrito terra superba Iove.
  19. Illic, sideream mundi qui temperat arcem,
  20. Exiguus tenero lac bibit ore puer.