Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Atque in transtra cadunt, et remis pectora pulsant.
  2. Ut primum rostris crepuerunt obvia rostra,
  3. In puppim rediere rates, emissaque tela
  4. Aera texerunt vacuumque cadentia pontum.
  5. Et iam diductis extendunt cornua proris,
  6. Diversaeque rates laxata classe receptae.
  7. Ut, quoties aestus Zephyris Eurisque repugnat,
  8. Huc abeunt fluctus, illuc mare: sic, ubi puppes
  9. Sulcato varios duxerunt gurgite tractus,
  10. Quod tulit illa ratis remis, haec repulit aequor.
  11. Sed Graiis habiles pugnamque lacessere pinus
  12. Et tentare fugam, nec longo frangere gyro
  13. Cursum, nec tarde flectenti cedere clavo.
  14. At Romana ratis stabilem praebere carinam
  15. Certior, et terrae similem bellantibus usum.
  16. Tunc in signifera residenti puppe magistro
  17. Brutus ait: Paterisne acies errare profundo,
  18. Artibus et certas pelagi? Iam consere bellum:
  19. Phocaicis medias rostris oppone carinas.
  20. Paruit, obliquas et praebuit hostibus alnos.