Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Innocua percussa sonant, sic omnia tela
  2. Respuit: at postquam virtus incensa virorum
  3. Perpetuam rupit defesso milite cratem,
  4. Singula continuis cesserunt ictibus arma.
  5. Tunc adoperta levi procedit vinea terra,
  6. Sub cuius pluteis et tecta fronte latentes
  7. Moliri nunc ima parant, et vertere ferro
  8. Moenia: nunc aries suspenso fortior ictu
  9. Incussus densi compagem solvere muri
  10. Tentat, et impositis unum subducere saxis.
  11. Sed super et flammis, et magnae fragmine molis,
  12. Et sudibus crebris, et adusti roboris ictu
  13. Percussae cedunt crates, frustraque labore
  14. Exhausto fessus repetit tentoria miles.
  15. Summa fuit Grais, starent ut moenia, voti.
  16. Ultro acies inferre parant: armisque coruscas
  17. Nocturni texere faces: audaxque iuventus
  18. Erupit: non hasta viris, non letifer arcus,
  19. Telum flamma fuit, rapiensque incendia ventus
  20. Per Romana tulit celeri munimina cursu.