Ab urbe condita

Anicius Scodra recepta nihil prius quam requisitos Petilium Perpennamque legatos ad se duci iussit.

quibus splendore suo restituto Perpennam extemplo mittit ad conprehendendos amicos cognatosque regis;

qui Meteonem, Labeatium gentis urbem, profectus Etlevam uxorem cum filiis duobus, Scerdilaedo Pleuratoque, et Caravantium fratrem Scodram in castra adduxit.

Anicius bello Illyrico intra triginta dies perfecto nuntium victoriae Perpennam Romam misit et post dies paucos Gentium regem ipsum cum parente, coniuge ac liberis ac fratre aliisque principibus Illyriorum.