Ab urbe condita

addit sceleri scelus; stirpem fratris virilem interimit; fratris filiae Reae Silviae per speciem honoris, cum Vestalem eam legisset, perpetua virginitate spem partus adimit.

sed debebatur, ut opinor, fatis tantae origo urbis maximique secundum deorum opes principium. vi compressa Vestalis cum geminum partum edidisset,

seu ita rata, seu quia deus auctor culpae honestior erat, Martem incertae stirpis patrem nuncupat.

sed nec dii nec homines aut ipsam aut stirpem a crudelitate regia vindicant;

sacerdos vincta in custodiam datur; pueros in profluentem aquam mitti iubet. forte quadam divinitus super ripas Tiberis effusus lenibus stagnis nec adiri usquam ad iusti cursum poterat amnis et posse quamvis languida mergi aqua infantes spem ferentibus dabat.