Epodi

Horace

Horace. Q. Horati Flacci Carmina. Vollmer, Friedrich, editor. Leipzig: Teubner, 1912.

  1. quid hoc veneni saevit in praecordiis?
  2. num viperinus his cruor
  3. incoctus herbis me fefellit? an malas
  4. Canidia tractavit dapes?
  5. ut Argonautas praeter omnis candidum
  6. Medea mirata est ducem,
  7. ignota tauris inligaturum iuga
  8. perunxit hoc Iasonem,
  9. hoc delibutis ulta donis paelicem
  10. serpente fugit alite.
  11. nec tantus umquam Siderum insedit vapor
  12. siticulosae Apuliae
  13. nec munus umeris efficacis Herculis
  14. inarsit aestuosius.
  15. at siquid umquam tale concupiveris,
  16. iocose Maecenas, precor,
  17. manum puella savio opponat tuo,
  18. extrema et in sponda cubet.