Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • auditis? an me ludit amabilis
  • insania? audire et videor pios
  • errare per lucos, amoenae
  • quos et aquae subeunt et aurae.
  • me fabulosae Volture in Apulo
  • nutricis extra limina Pulliae
  • ludo fatigatumque somno
  • fronde nova puerum palumbes
  • texere, mirum quod foret omnibus
  • quicumque celsae nidum Aceruntiae
  • saltusque Bantinos et arvum
  • pingue tenent humilis Forenti,
  • ut tuto ab atris corpore viperis
  • dormirem et ursis, ut premerer sacra
  • lauroque conlataque myrto
  • non sine dis animosus infans.
  • vester, Camenae, vester in arduos
  • tollor Sabinos, seu mihi frigidum
  • Praeneste seu Tibur supinum
  • seu liquidae placuere Baiae.