Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. pastorem Polyphemum et litora nota petentem,
  2. monstrum horrendum, informe, ingens, cui lumen ademptum.
  3. Trunca manu pinus regit et vestigia firmat;
  4. lanigerae comitantur oves—ea sola voluptas
  5. solamenque mali.
  6. Postquam altos tetigit fluctus et ad aequora venit,
  7. luminis effossi fluidum lavit inde cruorem,
  8. dentibus infrendens gemitu, graditurque per aequor
  9. iam medium, necdum fluctus latera ardua tinxit.
  10. Nos procul inde fugam trepidi celerare, recepto
  11. supplice sic merito, tacitique incidere funem;
  12. vertimus et proni certantibus aequora remis.
  13. Sensit, et ad sonitum vocis vestigia torsit;
  14. verum ubi nulla datur dextra adfectare potestas,
  15. nec potis Ionios fluctus aequare sequendo,
  16. clamorem immensum tollit, quo pontus et omnes
  17. contremuere undae, penitusque exterrita tellus
  18. Italiae, curvisque immugiit Aetna cavernis.
  19. At genus e silvis Cyclopum et montibus altis
  20. excitum ruit ad portus et litora complent.