Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. expediam dictis; prohibent nam cetera Parcae
  2. scire Helenum farique vetat Saturnia Iuno.
  3. Principio Italiam, quam tu iam rere propinquam
  4. vicinosque, ignare, paras invadere portus,
  5. longa procul longis via dividit invia terris.
  6. Ante et Trinacria lentandus remus in unda,
  7. et salis Ausonii lustrandum navibus aequor,
  8. infernique lacus, Aeaeaeque insula Circae,
  9. quam tuta possis urbem componere terra:
  10. signa tibi dicam, tu condita mente teneto:
  11. cum tibi sollicito secreti ad fluminis undam
  12. litoreis ingens inventa sub ilicibus sus
  13. triginta capitum fetus enixa iacebit.
  14. alba, solo recubans, albi circum ubera nati,
  15. is locus urbis erit, requies ea certa laborum.
  16. Nec tu mensarum morsus horresce futuros:
  17. fata viam invenient, aderitque vocatus Apollo.
  18. Has autem terras, Italique hanc litoris oram,
  19. proxuma quae nostri perfunditur aequoris aestu,
  20. effuge; cuncta malis habitantur moenia Grais.