Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Quid puer Ascanius? superatne et vescitur aura,
  2. quem tibi iam Troia—
  3. Ecqua tamen puero est amissae cura parentis?
  4. Ecquid in antiquam virtutem animosque virilis
  5. et pater Aeneas et avunculus excitat Hector?
  6. Talia fundebat lacrimans longosque ciebat
  7. incassum fletus, cum sese a moenibus heros
  8. Priamides multis Helenus comitantibus adfert,
  9. adgnoscitque suos, laetusque ad limina ducit,
  10. et multum lacrimas verba inter singula fundit.
  11. Procedo, et parvam Troiam simulataque magnis
  12. Pergama, et arentem Xanthi cognomine rivum
  13. adgnosco, Scaeaeque amplector limina portae.
  14. Nec non et Teucri socia simul urbe fruuntur:
  15. illos porticibus rex accipiebat in amplis;
  16. aulaï medio libabant pocula Bacchi,
  17. impositis auro dapibus, paterasque tenebant.
  18. Iamque dies alterque dies processit, et aurae
  19. vela vocant tumidoque inflatur carbasus austro.
  20. His vatem adgredior dictis ac talia quaeso: