Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. insequitur: solum densa in caligine Turnum
  2. vestigat lustrans, solum in certamina poscit.
  3. Hoc concussa metu mentem Iuturna virago
  4. aurigam Turni media inter lora Metiscum
  5. excutit et longe lapsum temone relinquit:
  6. ipsa subit manibusque undantis flectit habenas,
  7. cuncta gerens, vocemque et corpus et arma Metisci.
  8. Nigra velut magnas domini cum divitis aedes
  9. pervolat et pennis alta atria lustrat hirundo,
  10. pabula parva legens nidisque loquacibus escas,
  11. et nunc porticibus vacuis, nunc umida circum
  12. stagna sonat: similis medios Iuturna per hostis
  13. fertur equis rapidoque volans obit omnia curru
  14. iamque hic germanum iamque hic ostentat ovantem
  15. nec conferre manum patitur, volat avia longe.
  16. Haud minus Aeneas tortos legit obvius orbes
  17. vestigatque virum et disiecta per agmina magna
  18. voce vocat. Quotiens oculos coniecit in hostem
  19. alipedumque fugam cursu temptavit equorum,
  20. aversos totiens currus Iuturna retorsit.