Georgics

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. quae sint, quae fuerint, quae mox ventura trahantur;
  2. quippe ita Neptuno visum est, immania cuius
  3. armenta et turpes pascit sub gurgite phocas.
  4. Hic tibi, nate, prius vinclis capiendus, ut omnem
  5. expediat morbi causam eventusque secundet.
  6. Nam sine vi non ulla dabit praecepta, neque illum
  7. orando flectes; vim duram et vincula capto
  8. tende; doli circum haec demum frangentur inanes.
  9. Ipsa ego, te, medios cum sol accenderit aestus,
  10. cum sitiunt herbae et pecori iam gratior umbra est,
  11. in secreta senis ducam, quo fessus ab undis
  12. se recipit, facile ut somno adgrediare iacentem.
  13. Verum ubi correptum manibus vinclisque tenebis,
  14. tum variae eludent species atque ora ferarum
  15. Fiet enim subito sus horridus atraque tigris
  16. squamosusque draco et fulva cervice leaena,
  17. aut acrem flammae sonitum dabit atque ita vinclis
  18. excidet, aut in aquas tenues dilapsus abibit.
  19. Sed quanto ille magis formas se vertet in omnes,
  20. tanto, nate, magis contende tenacia vincla,